കോളിം​ഗ് ബെൽ കേട്ടാൽ വാതിൽ തുറക്കരുതെന്ന് പ്രദേശവാസികളോട് പൊലീസ്, ഭീതിപ്പെടുത്തുന്ന ദൃശ്യങ്ങൾ സിസിടിവിയിൽ‌, പുലർച്ചെയെത്തുന്ന അ‍ജ്ഞാതൻ

കോഴിക്കോട് താമരശ്ശേരി വീടുകളുടെ മുറ്റത്ത് പൂർണന​ഗ്നനായി എത്തി അജ്ഞാതൻ. പുലർച്ചെ നാല് മണിയോടെയാണ് വെഴുപ്പൂർ, ഒതയോത്ത് ഭാ​ഗത്തുള്ള വീടുകളിൽ ഒരാൾ എത്തിയത്. മുഖം മറച്ച അജ്ഞാതന്റെ ദൃശ്യങ്ങൾ സിസിടിവി ദൃശ്യങ്ങളിൽ പതിഞ്ഞിട്ടുണ്ട്. താമരശ്ശരി പൊലീസ് സ്റ്റേഷന്റെ മുൻവശത്തുള്ള പ്രദേശമാണ് ഒതയോത്ത്. വിവിധ വീടുകളിലെത്തിയ ഇയാൾ പൂർണന​ഗ്നനായിരുന്നു. വീടുകളുടെ പരിസരം നോക്കിയ ശേഷം കോളിം​ഗ് ബെല്ലടിക്കുന്നതാണ് ഇയാളുടെ രീതി.അങ്ങനെ ഒരു വീട്ടിലെത്തി കോളിം​ഗ് ബെല്ലടിക്കുന്ന സ‌മയത്താണ് സിസിടിവിയിൽ ദൃശ്യങ്ങൾ പതിഞ്ഞത്. വീട്ടുകാർ ബഹളം വെച്ചതിനെ തുടർന്ന് ഇയാൾ ഓടിരക്ഷപ്പെട്ടു. മോഷണമാണ് ലക്ഷ്യമെന്ന് സംശയിക്കുന്നതായി പൊലീസ് വ്യക്തമാക്കി. പൊലീസ് സ്ഥലത്തെത്തി തെളിവുകൾ‌ ശേഖരിച്ചിട്ടുണ്ട്. സിസിടിവിയാണ് പ്രധാന തെളിവ്. പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. അജ്‍ഞാതർ എത്തി കോളിം​ഗ് ബെല്ലടിച്ചാൽ വാതിൽ തുറക്കരുതെന്ന കർശന നിർദേശവും പൊലീസ് പ്രദേശവാസികൾക്ക് നൽകിയിട്ടുണ്ട്. സംഭവം പ്രദേശവാസികൾക്ക് ആശങ്കയുളവാക്കിയിട്ടുണ്ട്.