മിന്നല് പ്രളയങ്ങളും ഉരുള്പൊട്ടലും ഉണ്ടായേക്കാം: ജാഗ്രത വേണമെന്ന് മുഖ്യമന്ത്രി
തിരുവനന്തപുരം | ബംഗാള് ഉള്ക്കടലില് രൂപം കൊണ്ട ന്യൂനമര്ദ്ദത്തെ തുടര്ന്ന് കേരളത്തില് കാലവര്ഷം സജീവമായെന്ന് മുഖ്യമന്ത്രി പിണറായി വിജയന്. കേരളത്തില് അടുത്ത 3 ദിവസം കൂടി ശക്തമായ മഴ തുടരുമെന്നാണ് കേന്ദ്ര കാലാവസ്ഥ വകുപ്പ്.
അതിശക്തമായ മഴ തുടര്ച്ചയായി പെയ്യുന്നത് താഴ്ന്ന പ്രദേശങ്ങളില് വെള്ളക്കെട്ടുകളും മിന്നല് പ്രളയങ്ങളും സൃഷ്ടിച്ചേക്കാമെന്ന് മുഖ്യമന്ത്രി ചൂണ്ടിക്കാട്ടി. മലയോര മേഖലയില് മണ്ണിടിച്ചിലിനും ഉരുള്പൊട്ടലിനും ഇത് കാരണമായേക്കാം. അപകട സാധ്യതയുള്ള പ്രദേശങ്ങളില് താമസിക്കുന്ന പൊതുജനങ്ങള് ജാഗ്രത പാലിക്കണമെന്നും അധികൃതരുടെ നിര്ദ്ദേശം ലഭിച്ചാല് വീട്ടില് നിന്ന് സുരക്ഷിതമായ ക്യാമ്പുകളിലേക്ക് മാറാന് ജനങ്ങള് തയ്യാറാകണമെന്നും മുഖ്യമന്ത്രി ആവശ്യപ്പെട്ടു.
ശക്തമായതോ അതിശക്തമായതോ ആയ മഴയ്ക്ക് സാധ്യതയുള്ളതിനാല് വിവിധ ജില്ലകളില് ജൂണ് 16 വരെ ഓറഞ്ച്, മഞ്ഞ അലര്ട്ടുകള് പ്രഖ്യാപിച്ചിട്ടുണ്ടെന്ന് മുഖ്യമന്ത്രി അറിയിച്ചു. ജൂണ് 17 വരെയുള്ള ദിവസങ്ങളില് അറബിക്കടല് പ്രക്ഷുബ്ധമാകാന് സാധ്യതയുള്ളതിനാല് മത്സ്യത്തൊഴിലാളികള് കടലില് പോകാന് പാടില്ലെന്നും ഈ ദിവസങ്ങളില് ഉയര്ന്ന തിരമാല ജാഗ്രതാ നിര്ദ്ദേശമുള്ളതിനാല് തീരദേശവാസികള് ജാഗ്രത പാലിക്കണമെന്നും മുഖ്യമന്ത്രി പറഞ്ഞു.
View Comments (0)