‘വലിയ അധ്വാനവും പണച്ചെലവുമുള്ള ചിത്രമാണ് ആടുജീവിതം, ഇത് വേദനിപ്പിക്കുന്ന നിമിഷങ്ങൾ’: ബ്ലെസി

ആടുജീവിതം സിനിമയെ തകർക്കാൻ ബോധപൂർവമായ ശ്രമം നടക്കുന്നുവെന്ന് സംവിധായകന്‍ ബ്ലസി. നവമാധ്യമങ്ങളിൽ അടക്കം സിനിമയുടെ വ്യാജ പതിപ്പ് ഇറക്കിയത് ഇതിന്റെ ഭാഗമാണെന്നും, വലിയ അധ്വാനവും പണച്ചെലവുമുള്ള ചിത്രമാണ് ആടുജീവിതം, അതുകൊണ്ട് തന്നെ വേദനിപ്പിക്കുന്ന നിമിഷങ്ങളിലൂടെയാണ് താൻ ഇപ്പോൾ കടന്നുപോകുന്നതെന്നും ബ്ലെസി മാധ്യമങ്ങളോട് പറഞ്ഞു.

ആടുജീവിതം വ്യാജപതിപ്പിനെതിരെ സംവിധായകൻ ബ്ലെസി പരാതി നൽകിയിരുന്നു. നവമാധ്യമങ്ങളിൽ അടക്കം വ്യാജ പതിപ്പ് പ്രചരിപ്പിച്ച് സിനിമയ്ക്ക് വൻ സാമ്പത്തിക നഷ്ടം ഉണ്ടാക്കുന്നവർക്കെതിരെ നടപടി വേണമെന്ന് ആവശ്യപ്പെട്ടാണ് രേഖാമൂലമുള്ള പരാതി ബ്ലെസി സൈബർ സെല്ലിനും പൊലീസിനും നൽകിയത്.

അതേസമയം, ബ്ലെസിയുടെ പരാതിയിൽ ചെങ്ങന്നൂർ സ്വദേശിയെ പൊലീസ് അറസ്റ്റ് ചെയ്തതായി റിപ്പോർട്ടുകൾ പുറത്തുവന്നിട്ടുണ്ട്.