തലപ്പനക്കുന്ന് പാലത്തിന് 2.4 കോടി രൂപയുടെ ഭരണാനുമതി

കുന്നമംഗലം നിയോജക മണ്ഡലത്തിലെ തലപ്പനക്കുന്ന് പാലത്തിന് 2.4 കോടി രൂപയുടെ പുതുക്കിയ ഭരണാനുമതി ലഭ്യമാക്കിയതായി പി.ടി.എ റഹീം എം.എൽ.എ അറിയിച്ചു. ഈ പാലം നിർമ്മിക്കുന്നതിന് നേരത്തെ 1.5 കോടി രൂപയുടെ ഭരണാനുമതി ലഭ്യമാക്കിയിരുന്നുവെങ്കിലും പൊതുമരാമത്ത് നിരക്കിലും ജി.എസ്.ടിയിലും ഉണ്ടായ വർദ്ധനവ് കാരണം തുക തികയാതെ വന്നതിനെ തുടർന്നാണ് വർധിപ്പിച്ച തുകക്കുള്ള ഭരണാനുമതി ലഭ്യമാക്കിയത്.

ചാത്തമംഗലം, മാവൂർ ഗ്രാമപഞ്ചായത്തുകളെ ബന്ധിപ്പിച്ചുകൊണ്ട് നിർമ്മിക്കുന്ന ഈ പാലത്തിന്റെ പ്രവൃത്തി പൂർത്തീകരിക്കുന്നതോടെ മൂഴിപ്പുറത്ത്താഴം, തലപ്പനക്കുന്ന് ഭാഗങ്ങളിലേക്ക് എത്തിച്ചേരുന്നതിനുള്ള എളുപ്പ മാർഗ്ഗമായി ഈ പാലം മാറും.  സാങ്കേതിക നടപടികൾ പൂർത്തീകരിച്ച് പ്രവൃത്തി ടെൻഡർ ചെയ്യാൻ വേണ്ട അടിയന്തര നടപടികൾ സ്വീകരിക്കുന്നതിന് പൊതുമരാമത്ത് പാലങ്ങൾ വിഭാഗത്തിന് നിർദേശം നൽകിയതായും പി.ടി.എ റഹീം എം.എൽ.എ പറഞ്ഞു.