ലോക്‌സഭാ സീറ്റുകളുടെയും എംപിമാരുടെയും എണ്ണത്തിൽ വർധനവ്‌ വരുമെന്ന്‌ മോദി

ലോക്‌സഭാ സീറ്റുകളുടെയും എംപിമാരുടെയും എണ്ണത്തിൽ വൈകാതെ വർധനവ്‌ വരുമെന്ന്‌ പ്രധാനമന്ത്രി നരേന്ദ്ര മോദിയുടെ പ്രഖ്യാപനം. പുതിയ പാർലമെന്റിന്റെ ഉദ്‌ഘാടന പ്രസംഗത്തിലാണ്‌ പ്രഖ്യാപനം. 2026ൽ മണ്ഡലപുനർനിർണയം നടത്തി ലോക്‌സഭാ സീറ്റുകൾ സർക്കാർ കൂട്ടുമെന്ന്‌ ഇതോടെ തീർച്ചയായി. പഴയ പാർലമെന്റിൽ എംപിമാർക്ക്‌ ആവശ്യമായ ഇരിപ്പിടമില്ലായിരുന്നു. പുതിയ പാർലമെന്റിൽ ലോക്‌സഭയിൽ 888 പേർക്കും രാജ്യസഭയിൽ 300 പേർക്കും ഇരിക്കാനാകും–- മോദി പറഞ്ഞു.
ലോക്‌സഭാ സീറ്റുകൾ വർധിപ്പിച്ചാൽ ജനസംഖ്യാനിയന്ത്രണത്തിൽ പിന്നിലായ ഉത്തരേന്ത്യൻ സംസ്ഥാനങ്ങളിലാകും മണ്ഡലങ്ങൾ കൂടുക. കേരളം അടക്കം തെക്കൻ സംസ്ഥാനങ്ങളിൽ സീറ്റുകൾ വർധിക്കില്ല. ഉത്തരേന്ത്യയിൽ സീറ്റുകൾ കൂട്ടി ദേശീയ രാഷ്ട്രീയത്തിൽ ആധിപത്യം ഉറപ്പിക്കുകയെന്ന അജൻഡ ബിജെപിക്കും സംഘപരിവാറിനുമുണ്ട്‌.