കൗമാരക്കാർ ലൈംഗിക വികാരങ്ങൾ നിയന്ത്രിക്കണം: കൊൽക്കത്ത ഹൈക്കോടതി

പ്രായപൂർത്തിയാകാത്ത പെൺകുട്ടികളും ആൺകുട്ടികളും ലൈം​ഗിക വികാരങ്ങൾ നിയന്ത്രിക്കണമെന്നും ഇതര ലിം​ഗത്തിൽപ്പെട്ടവരെ ബഹുമാനിക്കണമെന്നും കൊൽക്കത്ത ഹൈക്കോടതി. പോക്സോ കേസിൽ പ്രതിയാക്കപ്പെട്ട കൗമാരക്കാരന്റെ തടവുശിക്ഷ റദ്ദാക്കിക്കൊണ്ടായിരുന്നു കോടതിയുടെ നിർദേശം.

പ്രായപൂർത്തിയാകാത്ത പെൺകുട്ടിയുമായി ലൈം​ഗിക ബന്ധത്തിലേർപ്പെട്ടതിലായിരുന്നു കേസെടുത്തത്. ഇത്തരം സങ്കീർണതകൾ ഒഴിവാക്കാൻ സമ​ഗ്ര ലൈം​ഗിക വിദ്യാഭ്യാസം സ്കൂളുകളിൽ ആവശ്യമാണെന്നും ജസ്റ്റിസുമാരായ ചിത്തരഞ്ജൻ ദാസ്, പാർഥസാരഥി സെൻ എന്നിവർ ചൂണ്ടിക്കാട്ടി. നിമിഷ നേരത്തെ സന്തോഷങ്ങൾക്കായി പെൺകുട്ടികൾ ഇത്തരം പ്രേരണകൾക്ക് വഴങ്ങരുതെന്നും ശരീരത്തിന്റെ അന്തസ്സും അഭിമാനവും സംരക്ഷിക്കേണ്ടത് പെൺകുട്ടികളുടെ കടമയാണെന്നും കോടതി നിരീക്ഷിച്ചു.