ഓണാഘോഷത്തിനിടെ മലയാളി വിദ്യാര്‍ഥിക്ക് കുത്തേറ്റു; സംഭവം ബെംഗളൂരുവില്‍
ബെംഗളൂരുവില്‍ കോളേജിലെ ഓണാഘോഷത്തിനിടെ സംഘര്‍ഷം. മലയാളിയായ വിദ്യാര്‍ഥിക്ക് സംഘര്‍ഷത്തില്‍ കുത്തേറ്റു. ആദിത്യ എന്ന വിദ്യാര്‍ഥിക്കാണ് കുത്തേറ്റത്. ആചാര്യ നഴ്‌സിങ് കോളേജിലാണ് ഓണാഘോഷത്തിനിടെ സംഘര്‍ഷം ഉടലെടുത്തത്. സംഭവത്തില്‍ നാല് വിദ്യാര്‍ഥികള്‍ക്കു നേരെ കേസെടുത്തു.
കോളേജില്‍ ഓണാഘോഷ പരിപാടികള്‍ നടക്കുന്നതിനിടെ അപ്രതീക്ഷിതമായാണ് സംഘര്‍ഷമുണ്ടാകുന്നത്. വിദ്യാര്‍ഥികള്‍ തമ്മില്‍ ഏറ്റുമുട്ടലുണ്ടാകുകയും ഇതിനിടെ ആദിത്യക്ക് വയറിന് കുത്തേല്‍ക്കുകയുമായിരുന്നു. ഉടനടി ആദിത്യയെ സമീപത്തെ ആശുപത്രിയില്‍ പ്രവേശിപ്പിച്ചു.
ആക്രമണത്തില്‍ ആദിത്യയുടെ കൂടെയുണ്ടായിരുന്ന സാബിത്ത് എന്ന വിദ്യാര്‍ഥിക്കും പരുക്കേറ്റിട്ടുണ്ട്. സാബിത്തിനെയും ആശുപത്രിയില്‍ പ്രവേശിപ്പിച്ചു. സംഭവത്തില്‍ സോളദേവനഹള്ളി പൊലീസ് കേസെടുത്തു. വധശ്രമം ഉള്‍പ്പെടെ ചുമത്തിയാണ് ആക്രമണം നടത്തിയ നാല് വിദ്യാര്‍ഥികള്‍ക്കു നേരെ പൊലീസ് കേസ് രജിസ്റ്റര്‍ ചെയ്തത്. ആദിത്യയുടെ നില ഗുരുതരമല്ലെന്നാണ് ആശുപത്രി അധികൃതരില്‍ നിന്നും ലഭിക്കുന്ന വിവരം
View Comments (0)