കേരള ബ്ലാസ്റ്റേഴ്സിന് ഞെട്ടിക്കുന്ന തോൽവി

കോഴിക്കോട് നടന്ന സൂപ്പർ കപ്പിലെ തങ്ങളുടെ രണ്ടാം മത്സരത്തിൽ വിജയം ഉറപ്പിച്ചിറങ്ങിയ കേരള ബ്ലാസ്റ്റേഴ്സിന് ഞെട്ടിക്കുന്ന തോൽവി. എതിരില്ലാത്ത രണ്ട് ​ഗോളുകൾക്കാണ് ഐ ലീ​ഗ് ക്ലബായ ശ്രീനിധി ‍‍ഡെക്കാൻ കേരളത്തെ തറപറ്റിച്ചത്. 2023 സീസണിൽ ഐ ലീ​ഗിൽ 42 പോയിന്റ് നേടി രണ്ടാമതെത്തിയ ശ്രീനിധി ആദ്യ പകുതിയിലെ രണ്ട് ​ഗോളുകൾക്ക് മുന്നിലെത്തിയിരുന്നു.

മത്സരത്തിന്റെ 17-ാം മിനിറ്റിലാണ് ആദ്യ ​ഗോൾ പിറന്നത്. മത്സരത്തിന്റെ ആദ്യ പകുതി അവസാനിക്കാൻ 2 മിനിറ്റ് മാത്രം ബാക്കി നിൽക്കേ ശ്രീനിധി രണ്ടാം ​ഗോളും നേടി. തോൽവിയോടെ കേരളത്തിന്റെ സെമി ഫൈനൽ പ്രതീക്ഷകൾക്ക് ഒരല്പം മങ്ങലേറ്റിട്ടുണ്ട്. നിലവിൽ 4 പോയന്റോടെ ശ്രീനിധിയാണ് ഒന്നാം സ്ഥാനത്ത്. രണ്ടാം പകുതിയിൽ കൂടുതൽ ആക്രമണം കേരളം അഴിച്ചു വിട്ടെങ്കിലും ​ഗോൾ മാത്രം അകന്നു നിന്നു.

ഹീറോ സൂപ്പർ കപ്പിലെ ബ്ലാസ്റ്റേഴ്സിന്റെ മൂന്നാമത്തെ മത്സരത്തിൽ ബം​ഗളൂരുവാണ് എതിരാളികൾ. ഐഎസ്എല്ലിലെ വിവാദ ​ഗോളിലെ തോൽവിക്ക് കണക്ക് തീർക്കാനിറങ്ങുന്ന ബ്ലാസ്റ്റേഴ്സിന് വിജയം അനിവാര്യമാണ്. അടുത്ത മത്സരത്തിലെ വിജയ പരാജയമനുസരിച്ചാണ് കേരളത്തിന്റെ സെമി സാധ്യതകൾ.