കാരശ്ശേരി കാരിയോട്ട് ബലരാമ ക്ഷേത്രത്തിൽ മോഷണം

കാരശ്ശേരി കാരിയോട്ട് ബലരാമ ക്ഷേത്രത്തിൽ കവർച്ച. ഇന്ന് പുലർച്ചെയോടെയാണ് ക്ഷേത്രമതിൽക്കകത്ത് കടന്ന മോഷ്ടാക്കൾ രണ്ട് ഭണ്ഡാരങ്ങൾ കുത്തിത്തുറന്ന് പണം കവർന്നത്.ക്ഷേത്രത്തിന് പുറത്തുവെച്ചിരുന്ന ഒരു ഭണ്ഡാരവും അകത്ത് സ്ഥാപിച്ചിരുന്ന ഭണ്ഡാരവുമാണ് കവർച്ച ചെയ്യപ്പെട്ടത്. ഏണി ഉപയോഗിച്ച് ക്ഷേത്രമതിൽ കെട്ടിനുള്ളിലേക്ക് കടന്ന മോഷ്ടാക്കൾ, ആളുകളുടെ ശ്രദ്ധയിൽപ്പെടാത്ത ഭാഗത്തേക്ക് ഭണ്ഡാരങ്ങൾ മാറ്റിയ ശേഷമാണ് കുത്തിത്തുറന്നത്. രാവിലെ ക്ഷേത്രത്തിലെത്തിയ ജീവനക്കാരാണ് ഭണ്ഡാരങ്ങൾ തകർത്ത നിലയിൽ കണ്ടെത്തിയത്.ക്ഷേത്ര ഭാരവാഹികൾ നൽകിയ വിവരത്തിന്റെ അടിസ്ഥാനത്തിൽ മുക്കം പോലീസ് സ്ഥലത്തെത്തി വിവരങ്ങൾ ശേഖരിച്ചു. പ്രദേശത്തെ സി.സി.ടി.വി ദൃശ്യങ്ങളും വിരലടയാള പരിശോധനയും കേന്ദ്രീകരിച്ച് പോലീസ് അന്വേഷണം ഊർജ്ജിതമാക്കിയിട്ടുണ്ട്.