
യാത്രക്കാർ നോക്കിനിൽക്കെ നടുറോഡിൽ സ്വകാര്യ ബസ് ജീവനക്കാരുടെ കൂട്ടയടി; സംഭവം കോഴിക്കോട്
യാത്രക്കാർ ബസ്സിലിരിക്കെ നടുറോഡിൽ സിറ്റി-പന്തീരാങ്കാവ് റൂട്ടിലോടുന്ന സ്വകാര്യ ബസ് ജീവനക്കാർ തമ്മിലടിച്ചു. കോഴിക്കോടാണ് സംഭവം. പന്തീരാങ്കാവ് റൂട്ടിലെ മത്സരയോട്ടമാണ് കൂട്ടയടിയിൽ കലാശിച്ചത്. ശനിയാഴ്ച വൈകീട്ട് അഞ്ചരയോടെ കോന്തനാരി സലീന പാലസിന് സമീപമായിരുന്നു സംഭവം.പെരുമണ്ണ റൂട്ടിലോടുന്ന ഇഷികമോൾ, പൊക്കുന്ന് വരെയോടുന്ന ഗുരു കൃപ എന്നീ ബസുകളിലെ ജീവനക്കാരാണ് തമ്മിലടിക്കുകയും തെറിവിളിക്കുകയും ചെയ്തത്. നാലരമണിയോടെ കോട്ടപ്പറമ്പ്, കല്ലായി റോഡ്, എംസിസി ബാങ്ക് ഭാഗങ്ങളിൽ നടന്ന ബസുകൾ തട്ടിക്കലും തെറിവിളിയുമാണ് കോന്തനാരിയിലെ അടിയിൽ കലാശിച്ചത്.സിറ്റി മുതൽ കിണാശ്ശേരി പരസ്പരം പ്രശ്നങ്ങളുണ്ടാക്കിയതിന് ശേഷം പൊക്കുന്ന് വരെ മാത്രം റൂട്ടുള്ള ഗുരുകൃപ ആളെ ഇറക്കി കോന്തനാരിയിൽ നിർത്തിയിടുകയായിരുന്നു. രണ്ട് ബസ്സുകാരും പരസ്പരം ബസ്സുകളുടെ ചില്ലുകൾ അടിച്ചു പൊട്ടിച്ചു. നാട്ടുകാർ ഇടപെട്ടാണ് ഇവരെ പിടിച്ചു മാറ്റിയത്. ഇതിനിടെ പെരുമണ്ണ ബസ്സിൽ നിന്നും യാത്രക്കാരെ ഇറക്കാനുള്ള ജീവനക്കാരുടെ ശ്രമത്തെ യാത്രക്കാർ കൂട്ടമായി എതിർത്തു.തുടർന്ന് പെരുമണ്ണ ബസ് യാത്ര തുടരുകയായിരുന്നു. ബസ് ജീവനക്കാർ തമ്മിലുള്ള തെറി വിളിയും മത്സരയോട്ടവും യാത്ര ചെയ്യാൻ വലിയ പ്രയാസമുണ്ടാക്കുന്നതായി യാത്രക്കാർ പറയുന്നു. ജീവൻ പണയം വെച്ച് യാത്ര ചെയ്യേണ്ട അവസ്ഥയിലാണെന്നാണ് യാത്രക്കാർ പറയുന്നത്.
© Copyright - MTV News Kerala 2021





View Comments (0)