നടിയെ ആക്രമിച്ച കേസ് ;ബാലചന്ദ്രകുമാറിന്റെ മരണത്തിൽ പ്രാഥമിക അന്വേഷണം
നടിയെ ആക്രമിച്ച കേസിലെ പ്രധാന സാക്ഷി ബാലചന്ദ്രകുമാറിന്റെ മരണത്തില് തിരുവനന്തപുരം മെഡിക്കല് കോളേജ് പൊലീസ് പ്രാഥമിക അന്വേഷണം ആരംഭിച്ചു. ബാലചന്ദ്രകുമാറിന്റെ ഭാര്യ ഷീബയുടെ മൊഴി പൊലീസ് രേഖപ്പെടുത്തി. ബാലചന്ദ്രകുമാറിന്റെ ചികിത്സാ രേഖകള് ഷീബ പൊലീസിന് കൈമാറി. കുടുംബ സുഹൃത്ത് അനന്തു സുരേഷും മൊഴി നല്കിയിട്ടുണ്ട്. അനന്തു സുരേഷിന്റെ പരാതിയിലാണ് പൊലീസ് അന്വേഷണം. മരണത്തിലും ചികിത്സയിലും ദുരൂഹത ഉണ്ടെന്നാണ് പരാതി. ഡോക്ടര്മാരുടെ ഇടപെടലുകള് അന്വേഷിക്കണമെന്നും ആവശ്യമുണ്ട്. സ്വകാര്യ ആശുപത്രിയിലെ രണ്ട് ഡോക്ടര്മാര്ക്ക് എതിരെയാണ് ആരോപണം. ബാലചന്ദ്രകുമാറിന് മറ്റ് അസുഖങ്ങള് ഒന്നുംതന്നെ ഉണ്ടായിരുന്നില്ലെന്ന് ഭാര്യ നേരത്തെ പ്രതികരിച്ചിരുന്നു. ബാലചന്ദ്രകുമാറിനെ മനഃപൂര്വ്വം അപകടപ്പെടുത്താന് വേണ്ടി ചില ഡോക്ടര്മാര് ഇടപെടലുകള് നടത്തി എന്ന് വിശ്വസിക്കാവുന്ന ചില വിവരങ്ങള് തനിക്ക് ലഭിച്ചതായി അനന്തു പരാതിയില് സൂചിപ്പിച്ചിട്ടുണ്ട്. ചെങ്ങന്നൂരിലെ സ്വാര്യ ആശുപത്രിയില് ചികിത്സയിലിരിക്കെ 2024 ഡിസംബര് പതിമൂന്നിനായിരുന്നു ബാലചന്ദ്രകുമാറിന്റെ മരണം. നടിയെ ആക്രമിച്ച കേസില് നിര്ണായകമായിരുന്നു ബാലചന്ദ്രകുമാറിന്റെ വെളിപ്പെടുത്തലുകള്. കേസില് ദിലീപിന്റെ പങ്കാളിത്തം തെളിയിക്കുന്ന നിരവധി ഓഡിയോ സംഭാഷണങ്ങളും അനുബന്ധ തെളിവുകളും ബാലചന്ദ്രകുമാര് പുറത്ത് വിട്ടിരുന്നു. നടിയെ ആക്രമച്ചതിന്റെ ദൃശ്യങ്ങള് ഒരു വിഐപി വഴി ദിലീപിന്റെ കൈവശം എത്തിച്ചേര്ന്നുവെന്നായിരുന്നു ബാലചന്ദ്രകുമാറിന്റെ വെളിപ്പെടുത്തല്. ദിലീപും പള്സര് സുനിയും തമ്മില് അടുത്ത ബന്ധമുണ്ടെന്നും ബാലചന്ദ്രകുമാര് വെളിപ്പെടുത്തിയിരുന്നു. കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ദിലീപ് ശ്രമിച്ചുവെന്നും ബാലചന്ദ്രകുമാര് പറഞ്ഞിരുന്നു l. കോടതിയില് ബാലചന്ദ്രകുമാര് ദിലീപിനെതിരെ രഹസ്യമൊഴിയും നല്കിയിരുന്നു. അസുഖബാധിതനായിരിക്കെ ആരോഗ്യസ്ഥിതി പരിഗണിക്കാതെയായിരുന്നു ബാലചന്ദ്രകുമാര് നടിയെ ആക്രമിച്ച കേസിന്റെ വിചാരണയില് പങ്കെടുത്തത്.
View Comments (0)